間中瞓唔好，個人燥底啲好正常。但如果長期唔夠瞓，問題就唔止係心情差咁簡單啦。研究顯示穩定而良好的睡眠質素，對身體各種機能都有好處。想改善血糖水平?想提高工作表現?想減肥但又冇心機做運動?話唔定你需要嘅只係睡得足夠!
圖/摘自freepik
腦筋清醒轉數快
試過唔夠瞓記憶力變差未?其實，睡眠係學習和記憶嘅重要一環。睡眠質素差，會降低集中精神和吸收新知識能力，頭腦會缺乏足夠時間去整理和儲存日間接觸到的資訊，使人變得健忘。所以，想要記性好轉數快，就要讓腦筋有足夠休息。
人靚心情好
腦部在睡眠期間發揮的另一個功能，就係處理情緒。休息得好，處事態度和眼光都會比較正面和清晰。相反，唔夠瞓嘅人通常會表現得較為負面和消極。如果長期睡眠不足，罹患情緒病機會大增。一項大型研究顯示，失眠困擾人士患上抑鬱症、焦慮症或驚恐症的機會比常人至少高出五倍。所以，唔好睇小瞓覺咁平常嘅事，佢可以幫助你化解負面情緒，令你容光煥發，重新上路。
圖/摘自freepik
保心養心
睡眠期間，血壓下降，能稍為減輕心臟和血管工作量。按此道理，瞓得少平均血壓自然比較高。高血壓對健康有深遠影響，而心臟病和中風等嚴重症狀都同佢有關。想心臟襟用啲?每日瞓多啲啦。
提高運動表現
對於注重爆發力嘅運動，如摔角或舉重等，睡眠影響並不明顯。但對於講求耐力嘅運動，如跑步、游泳和單車，缺乏睡眠真係可大可小架!
睡眠不足，唔單止剝削肌肉修復時間，更使人無精打采，提不起勁。眼瞓嘅人唔單止反應遲鈍，連體力和意志都比較薄弱，面對持久賽事會難上加難。因此專業或業餘運動員，或喜歡運動人士，必須要盡量保持睡眠質素良好。
穩定血糖水平
睡眠分開幾個不同階段，當進入深層睡眠階段，血糖水平便會下降。深層睡眠時間若不足夠，血糖水平便無法降下來，一直維持在高水平。這會影響人體機能，削弱身體回應細胞需求和調整血糖水平能力，增加患上二型糖尿病機會。唔想陷入糖尿危機，今日就開始努力提高睡眠質素，爭取足夠嘅深層睡眠啦。
圖/摘自freepik
戰勝病菌病毒
為了保持身體健康，免疫系統會識別體內任何有害病菌和病毒，然後將它們逐一剷除。持續睡眠不足會破壞免疫細胞的功能，降低它們攻擊病菌的速度，患病係遲早嘅事。
平日唔好好休息，攪到身體過勞，免疫力降低而病倒，最後咪一樣要瞓返，不過到時就係卧病在床啦。如果有得揀，你會想平日瞓多啲，定病緊時候瞓返呢?
控制體重
睡眠質素差會容易肚餓，因為瞓得少會增加飢餓素(ghrelin)和減低瘦體素(leptin)嘅分泌。這兩種荷爾蒙調節嘅係食慾，如失調不但會令人胃口大開，更難抵垃圾食物引誘。再加上睡眠不足帶來嘅疲倦感，人自然郁得少啲，雙重夾攻下，想唔肥都幾難。
可見，用幾多時間瞓覺，會決定了你花幾多時間食嘢同埋做運動，對體重嘅影響絕對不容忽視。
要瞓幾多，人人有別，但平均來說，超過9個鐘嘅睡眠，對身體害處係大過益處。研究發現，瞓得多嘅人，心臟動脈會積聚較多鈣質，腿部動脈彈性也比較低。想達到最佳的健康效益，就以7-8個鐘的睡眠為目標吧!
